`လောကမှာ လူပြိန်းတွေပဲများတယ် သီဟရဲ့။ အဲဒီစကားရှင်းပါတယ်။ မင်းလက်ခံတယ်မို့လား´
`လောကနီတိတောင် ညွန်းတယ်မို့လား၊ ရဲရင့်သူကို သင်းခွဲပြီး အနိုင်ယူရမယ်တဲ့။ မင်းရဲ့အဖေါ်တွေဟာ သူတို့ထက် အများကြီးသာနေတဲ့ မင်းကို မနာလိုဖြစ်တဲ့အခါ ဒီနည်းကို သုံးလိုက်ကြတာပဲ´
`ဒါပေမဲ့ ဒီအပေါ်မှာ မင်း လွန်လွန်ကဲကဲ ခံစားစရာမလိုဘူး။ ဘာဖြစ်လို့လဲဆိုတော့ ဒါဟာ လူ့သဘာဝမို့လို့ပဲ။ မင်းနေရာမှာ တခြားလူဆိုရင်လည်း မင်းလို အလုပ်ခံရမှာပဲ။ သူတို့နေရာမှာ တခြားသူတွေဆိုရင် သူတို့လုပ်သလို လုပ်ကြမှာပဲ။ မင်းမှ.. သူတို့မှရယ် မဟုတ်ပါဘူး။ အုပ်စုတစ်ခုထဲမှာ တစ်ယောက်က ကျန်သူ အားလုံးထက် မြင့်မားသာလွန်နေရင် ကျန်တဲ့သူတွေက သူ့ကို မနာလိုဖြစ်ပြီး စော်ကားတိုက်ခိုက်လာမှာပဲ။ လူ့လောကနဲ့ လူတွေဆိုတာ ဒီလိုပါပဲ သူငယ်ချင်းရယ်။ ပုထုဇဉ် လက်မှတ်ရထားတဲ့ သဘာဝကျကျ အရူးတွေဆီမှာ ဒီအတိုင်းဖြစ်နေမှာပဲ´
`လူ့သဘာဝတွေကို မင်းနားလည်မှုထားပေးလိုက်ပါ။ လူတွေမှာ ကိုယ်ဖြစ်စေချင်တာတွေ ဖြစ်ရင်လည်း ဖြစ်လာမယ်၊ ဖြစ်ချင်မှလည်း ဖြစ်လာလိမ့်မယ်။ လူ့သဘာဝဆိုတဲ့ ၀င်္ကပါထဲမှာ သူတို့ လှည့်လည်နေတာပဲ။ ကိုယ့်ကိုယ်ကိုမို့လို့ ထောက်ခံနေတာလည်း မဟုတ်ဘူး။ ဆန့်ကျင်နေတာလည်း မဟုတ်ဘူး။ သူတို့ လမ်းကြောင်း အတိုင်းသူတို့ လျှောက်နေရင်း ကိုယ့်ကို ခလုတ်တိုက်နေကြတာပါ။ အဲဒီသဘာဝကို နားလည်ထားမယ်ဆိုရင် လောကဟာ မင်းအတွက် တစ်ဝက်ပေါ့ပါးသွားပါလိမ့်မယ်´
`တကယ်တော့ ဒီလောကဟာ တို့ အခုဝင်ကြည့်ခဲ့တဲ့ ဆပ်ကပ်ကလေးထက် အများကြီးပွေလီတဲ့ ဆပ်ကပ်ကြီးပဲ။ ဆပ်ကပ်ပညသည်တွေ၊ ဆပ်ကပ်ကို သဘောကျလို့ လက်ဖ၀ါးချင်း ပါးရိုက်ပြီး သြဘာပေးတတ်သူတွေဟာ တို့ပါတ်ဝန်းကျင်မှာ ရေမရလောက်အောင် များလှပါတယ်။ လေ့လာသူတစ်ယောက်လို ကြည့်နေပါ သူငယ်ချင်း။ အဲဒီထဲမှာ ပါဝင်မခံစားပါနဲ့။ လောကမှာ သားရဲဘုရင်ဆိုတဲ့ ခြင်္သေ့တွေက မြက်မစားသလို လှည့်ဖြားကောက်ကျစ် တတ်တဲ့ မြေခွေးကလည်း မြက်မစားဘူး။ အဲဒါကိုတော့ အထူးသတိထားပါကွာ။
တာရာမင်းဝေ
(ဓါးသွားပေါ်မှာကတဲ့ ဆပ်ကပ်...)မှ
No comments:
Post a Comment